Tunc ipsi discipuli Domini reversi sunt Hierosolyma, et erant perseverantes unanimiter in oratione usque ad decimum diem, quod est Pentecoste, et dicitur quinquagesimus dies, dominicus; et in ipsa die, hora tertia, factum est repente de coelo sonus, tanquam advenientis spiritus vehementis, et implevit totam domum ubi erant sedentes apostoli. Et apparuerunt illis dispertitae linguae tanquam ignis, seditque supra singulos eorum, et repleti sunt omnes Spiritu sancto, et coeperunt loqui aliis linguis, prout Spiritus sanctus dabat eloqui illis; et composuerunt Symbolum. Petrus: Credo in Deum Patrem omnipotentem creatorem coeli et terrae. Joannes: Et in Jesum Christum Filium ejus unicum Dominum nostrum. Jacobus dixit: Qui conceptus est de Spiritu sancto, natus ex Maria virgine. Andreas ait: Passus sub Pontio Pilato, crucifixus, mortuus, et sepultus. Philippus dixit: Descendit ad inferna. Thomas ait: Tertia die surrexit a mortuis. Bartholomaeus ait: Ascendit ad coelos, sedit ad dexteram Dei Patris omnipotentis. Matthaeus ait: Inde venturus judicare vivos et mortuos. Jacobus Alphaei dixit: Credo in Spiritum sanctum. Simon Zelotes ait: Sanctam Ecclesiam catholicam. Judas Jacobi dixit: Sanctorum communionem, remissionem peccatorum. Item Thomas ait: Carnis resurrectionem, vitam aeternam.